?

Log in

No account? Create an account

Previous Entry | Next Entry

ГЛЫБОКАЕ (Віцебская вобласць). Частка 1 http://azarkinm.livejournal.com/175405.html


Вандруем далей?


Што ж яшчэ цікава паглядзець турысту ў Глыбокім.

Да гістарычных мясцінаў у мястэчку адносяцца старыя каталіцкія могілкі – Капцёўка.


На іх можна пабачыць:

Капліца св.Іллі пабудаваная на могілках у канцы ХVІІІ ст.



фота з www.globus.tut.by

Калона ў гонар Канстытуцыі Рэчы Паспалітай, якая была прынята 3 траўня 1791 года і з'яўляецца першай Канстытуцыяй у Еўропе, і другой у свеце (першая ў свеце – Канстытуцыя ЗША у 1787 годзе).


Польскія ваенныя могілкі, дзе пахаваны жаўнеры савецка-польскай вайны 1920 года.




Магіла барона Мюнхаўзена, якая была знойдзена некалькі год таму краязнаўцам Уладзімірам Скрабатуном і з тых часоў прыцягвае да сябе турыстаў.


Зразумела, што гэта не той самы Мюнхаўзен, але з'яўленне гэтага пахавання надало турыстам яшчэ адну падставу наведваць Глыбокае. З-за адсутнасці ў нас дакладнай мапы з месцам спачыну Мюнхаўзенаў, мы зладзілі сваеасаблівы квэст па пошуку. Таму... фатаздымкі вам у дапамогу, пазначаць дакладнае месца на мапе не буду. Глядзіце на фота, шукайце асаблівасці, падказкі і стварайце свой квэст.




У 2014 годзе, калі горад адзначаў сваё 600-годдзе, каля Капцёўскіх могілак быў усталяваны помнік знакамітаму барону.


Апошнія гады, горад напаўняецца ўсё новымі вобразамі і скульптурамі.

Галерэя выбітных ураджэнцаў Глыбоччыны (2012 год).




Сярод бюстаў можна знасці выявы гісторыка і палітычнага дзеяча Вацлава Ластоўскага, мастака Язэпа Драздовіча, актора і рэжысёра Ігната Буйніцкага, авіяканструктара Паўла Сухога, айца сучаснага іўрыта Эліэзера Бэн-Іегуда, пісьменніка, аўтара рамана "Знахар" Тадэвуша Дапенгі-Мастовіча, ну і вядома бюст знакамітага фундатара Язэпа Корсака.




Помнік Кнізе (2012 год).

Знаходзіцца на зялёнай тэрыторыі цэнтральнай плошчы паміж сучаснай царквой і Траецкім касцёлам.

Там жа можна пабачыць і скульптуру "Іесус Хрыстос і самаранка" (2014 год).


"Дзед-глыбачанін", 2015 год, на беразе Кагальнага возера.

фота з сайта www.nn.by

Гэты дзед мае гістарычны прататып. У скульптуры ўвасобілі постаць краязнаўца, гісторыка, жыхара Глыбокага Аляксандра Сабалеўскага, які ў 87 год пачаў пісаць кнігу пра гісторыю Глыбоччыны, а праз 4 гады яшчэ і выдаў яе. Помнік пастаўлены на ахвяраванні яго ўнукаў.

Дарэчы, упарадкаванне набярэжнай вакол возера Кагальнае прызнана лепшым у краіне. Там пракладзены веласцежкі, пастаўлены альтанкі, зладжаны месцы адпачыну з кафэ і дзіцячымі зонамі.


Помік "Сям'я". У 2016 годзе размешчаны недалёка наберажнай возера Кагальнага.

не маё фота, проста не пазначыла дзе брала

"Глыбоцкая вішня" (2013 год).

Помнік адчынілі ў год першага фестывалю "Глыбоцкай вішні", які зараз праходзіць штогадова ў мястэчку. Глыбоччына багата сваімі вішнёвымі садамі, а дзякуючы Баляславу Лапыру (1895–1945), які тут жыў і працаваў у 1930-я гады, навакольныя вёскі маюць разнастайныя гатункі гэтых дрэў. Баляслаў быў таленавітым аграномам-селекцыянерам, які арганізаваў аграрныя курсы для сялян, стварыў беларускі тэатральны гуток і прымаў удзел у пастаноўках. За "агітацыю беларускасці" ва ўзросце 44 год быў адпраўлены польскай уладай на пенсію з пасады павятовага агранома. У 1943 годзе разам з сям'ёй з'ехаў у Нямеччыну, але пасля сканчэння вайны вярнуўся ў Глыбокае. У 1945 годзе быў закатаваны на допыце НКВДзістамі. Жонка пасля знікнення мужа перапісала чатырох дзяцей на сваё дзявочае прозвішча і з'ехала ў Гданьск.

Мне сустрэўся цудоўны артыкул, дзе пераплялося ўсё – і сучаснасць, і лёс Лапыра, і вайна, і зруйнаваныя помнікі Глыбокага. Пачытайце, думаю, будзе цікава і вам http://www.svaboda.org/a/24979679.html


Малюнкі, якія маглі стаць афіцыйным лагатыпам Фэста. Перамог №2, хаця мне больш падабаецца з аленем.

Насупраць помніка вішні, ў "Парку Перамогі" можна знайсці помнік загінуўшым у Другой сусветнай вайне,


і помнік жыхарам мястэчка, якія загінулі ў Афганістане.


Алея Ліхтароў (2016 год).


13 ліхтароў з рознай тэматыкай размясціліся вакол возера Вялікае і ўздоўж канала, які злучае Вялікае з Кагальным возерам. Як па мне, дык літары выглядзяць недарэчна і праставата. Але на густ сяброў няма, камусьці ж яны падабаюцца.


Да апошняга часу ў горадзе быў яшчэ адзін помнік, які прыцягваў турыстаў сваёй недарэчнасцю. Гэта помінік самаму дзіўнаму Леніну, які можна было знайсці ў нашай краіне. Некалькі год таму яго прыбралі на "рэстаўрацыю", але назад так і не вярнулі.

фота ад darriuss
Блукаючы па гораду ў пошуках гістарычных будынкаў і гарадскіх скульптур, можна завітаць і ў гісторыка-этнаграфічным музей, які размясціўся на вул.Энгельса 24, у будынку былога гарадскога савета. Найбольшую каштоўнасць тут прадстаўляюць малюнкі і дыванкі знакамітага мастака Язэпа Драздовіча.

Побач з Глыбокім, недалёка ад былога кляштара базыльян знаходзіцца Мемарыяльны комплекс "Борак".

фота з сайта www.kraj.by

Мемарыяльны комплекс быў пабудаваны ў аднайменным урочышчы ў 1964 годзе на месцы, дзе былі забіты італьянскія і савецкія ваеннапалонныя Беразвецкага канцлагера. Адміністрацыя канцлагера знаходзілася ў будынках кляштара, а вязняў трымалі на адкрытай пляцоўцы непадалёк. Тут не было ніякіх будынкаў і, каб сагрэцца, палонныя капалі ямы, дзе можна было размясціцца па некалькі чалавек. Капалі па вечарах і ў начы, бо днём была яшчэ праца на чыгуначнай станцыі, дзе разгружалі вагоны і разбіралі ўзарваныя партызанамі шляхі. Тых, хто замёрз, ці памёр ад хваробы вывозілі ва ўрочышча, дзе скідвалі ў агульную яму. А з набліжэннем савецкіх войскаў усе ваеннапалонныя канцлагера былі вывезены ў лес і растраляны.

фота з сайта www.belarus.by

Адразу пасля Другой сусветнай вайны Борак наведала камісія, якая пацвердзіла факт злачынства. 27 тысяч салдат, якія засталіся назаўсёды невядомыя, былі пахаваны ва ўрочышчы. У 1946 годзе тут быў усталяваны абеліск, а ў 1964 адчынены Мемарыяльны комплекс.

фота ад biggoga

Ёсць у Глыбокім і свой Дэндрапарк, які быў закладзены ў 1963 годзе інжынерам па лясным культурам Віктарам Ламакай для вывучэння магчымасцяў вырошчвання розных відаў у розных кліматычных умовах. Знаходзіцца ён каля трасы Глыбокае-Полацак, усяго ў 1,5 км ад горада і займае тэрыторыю ў 8 га. Супрацоўнікі рупліва сабралі тут каля 500 відаў раслін з усіх кантынентаў планеты. Па колькасці прадстаўленых відаў Глыбоцкі дэндрапарк саступае толькі Батанічнаму саду Акадэміі Навук у Мінску.

фотакалаж па фатаздымкам vinka_tinka2, aofedorov , форум www.globus.tut.by і www.аif.by

Парк разбіты на 12 зон, тут высаджана каля 1100 дрэваў, 26 000 кустарнікаў, 4,6 км жывой агароджы, выстаўлена 12 шпалер для вьюноў, зроблена 3 вадаёма, дзе растуць разнастайныя водныя расліны, а на адным схіле зроблена альпійская горка, якая займае прастору ў 60 м.кв.
Сярод рэдкіх раслін тут можна сустрэць: гінгко, аксаміт амурскі, радэндрон катаўбінскі, елку змеявідную, ліпу крупналістую, ціс ягадны, арэх манчжурскі сэрцавідны шэры, бук лясны, конскі каштан, чаромху Маака. Для ўтульнасці наведвальнікаў у парку знаходзяцца альтанкі і выстаўлены лаўкі. І самая галоўная асаблівасць дэндрапарка – усе сцежкі парка засаджаны травой і абкошаны.

Побач з дэндрапаркам размешчана зона з аленямі.

форум www.globus.tut.by

Што ж прывесці з вандроўкі ў мястэчка ГЛЫБОКАЕ?

На першым месцы – вядомая Глыбоцкая сгушчонка , на другім месцы – іншыя малочныя вырабы Глыбоцкага малочнага камбіната www.glmkk.by, і на трэццім – глыбоцкія кілбасы www.glubmk.by/katalog.php. А яшчэ, не забывайце ў крамах, што амаль усе раённыя цэнтры маюць свае хлебзаводы. Таму, заўсёды ёсць, што пакаштаваць новага ў Беларусі.

І самае апошняе, што трэба ведаць турысту ў Глыбокім. Дзе ж знаходзяцца помнікі. :-)





Comments

( 8 comments — Leave a comment )
budgawl
Nov. 23rd, 2016 05:57 pm (UTC)
вишня есть, а сгущенки клюквы - нет(
azarkinm
Nov. 23rd, 2016 06:09 pm (UTC)
Не тое свята, не тая сімволіка. Фэст та вішнёвы. )))
livejournal
Nov. 23rd, 2016 06:33 pm (UTC)
Дзень добры! Ваш запіс трапіў у топ-25 папулярных запісаў LiveJournal Беларусі! Больш падрабязна пра рэйтынг чытайце ў Даведцы.
rannica
Nov. 23rd, 2016 06:42 pm (UTC)
А я была ў Глыбокім і нават десяці адсоткаў не пабачыла! Ах, як шкадую цяпер! Які ж горад Цікавы!
azarkinm
Nov. 23rd, 2016 06:53 pm (UTC)
А калі былі?
rannica
Nov. 23rd, 2016 07:20 pm (UTC)
У чэрвені 2014. І яшчэ прыехалі ўвечары, вішні здымалі ў цемры нават ) Але смачную гарбату пілі недзе ў цэнтры, нават месца не памятаю.
azarkinm
Nov. 24th, 2016 02:31 am (UTC)
Ну тады ўжо было шмат помнікаў у мястэчку. І гістарычныя мясціны нікуды не знікалі. Можа атрымаецца, яшчэ наведаць Глыбокае, тады ўжо не палянуйцеся, пагуляйце па гораду. Ён вельмі-вельмі ўтульны.
pavellic
Nov. 24th, 2016 04:47 pm (UTC)
дзякуй
( 8 comments — Leave a comment )

Profile

leta i ja
azarkinm
AzarkinM

Latest Month

May 2018
S M T W T F S
  12345
6789101112
13141516171819
20212223242526
2728293031  

Tags

Powered by LiveJournal.com